TARİHİY ASABALIĞIMIZĞA
SEVGİ AŞLAĞAN YARIŞ
"Aile degerlikleri" konkursınıñ 2014 senesi içün yekünleri çekildi
Lenera KEZLEVLİ
"Aile degerlikleri" konkursınıñ 2014 senesi içün yekünleri çekildi
Lenera KEZLEVLİ
Mına, endi sekiz yıldır ki, qırımtatar mekteplileri arasında pek sevilgen ve beklenilgen yarış ötkerile. Qırımtatar tilini, medeniyetini ve tarihını ögrenmek ve saqlap qalmaqnen bir sırada olar aqqında zemaneviy tehnologiyalar yardımınen ikâye etmek maqsadı ile teşkil olunğan "Aile degerlikleri" yarışı er sefer bir til bayramına çevirile. Mart 28 künü ananeviy "Til – halqnıñ eñ büyük qıymetidir" Bütünqırım festivali çerçivesinde "Aile degerlikleri"niñ finalı olıp keçti.
Bu sene jüri azaları cemi 30 işni baqıp çıqtılar. Olar üç nominatsiyağa, yani referat, mültimedia taqdimatı ve video nominatsiyalarına taqsimlenip, 18 iş finalğa keçti. Saq, Aqmescit, Bağçasaray, Eski Qırım, Sudaq şeerinden ve Canköy, Qurman rayonlarından kelgen iştirakçiler bugünki ağır vaziyetke baqmadan, zengin keçmişimiznen bir daa ğururlanmaq ve tarihımıznıñ daa belli olmağan saifelerini açmaq içün imkân yarattılar.
Jüriniñ eyyeti ögünde qıyın bir mesele turdı, çünki yarışçılarnıñ er biri aqiqaten ğaliplikke lâyıq işlerni taqdim etti. Bu sefer finalda adetince eski Quran, namazlıq, ev eşyalarınen birge qıymetli mektüpler aqqında tarif etildi. Bunıñnen beraber bazı balalarnıñ nadir urbalar ve özleriniñ şanlı ecdatları aqqında ilk kere yapqan filmleri numayış etildi. Eminim ki, bu qısqa, amma pek de mündericeli filmler keniş dairege kösterilmek içün lâyıqlar.
Şunı da mıtlaqa qayd etmek ister edim ki, yarışqa nisbeten meraq yıl-yıldan arta ve bu yıl atta 2-nci sınıf talebesi çıqışta bulunıp, ailesinde saqlanğan eski cezve aqqında tarif etti.
Yarışnıñ tesisçisi – "Közaydın" informatsion-resurs merkeziniñ reisi Zarema Hayredinova qayd etkeni kibi, bu işlerniñ emiyeti ğayet büyük olıp, olar tarihımıznı kelecek nesillerge yetkizmek içün faydalı bir menba olaraq hızmet eterler.
Konkurs iştirakçilerine ait diplomlarnen beraber "Közaydın" informatsion-resurs merkezi em de iş adamı Seitümer Berberov tarafından azırlanğan hatıra bahşışları taqdim etildi.
